គណបក្សប្រជាជនកម្ពុជាខេត្តកំពង់ឆ្នាំង ចែកអំណោយ និងប័ណ្ណសរសើរជូនដល់សិស្សប្រឡងជាប់សញ្ញាបត្រមធ្យមសិក្សាទុតិយភូមិ និងសិស្សពូកែផ្នែកគណិតវិទ្យា នៅវិទ្យាល័យព្រះបាទសុរាម្រឹត

---

កំពង់ឆ្នាំង៖ សិស្សានុសិស្សវិទ្យាល័យព្រះបាទសុរាម្រឹតចំនួន ២៣ នាក់ ជាសិស្សពូកែប្រឡងជាប់សញ្ញាប័ត្រមធ្យមសិក្សាទុតិយភូមិ និងសិស្សពូកែប្រឡងជាប់ផ្នែកគណិតវិទ្យា នៅព្រឹកថ្ងៃទី២៤ ខែមករា ឆ្នាំ ២០២២ បានទទួលអំណោយ និងប័ណ្ណសរសើរ ពីលោក ជំទាវ ប៊ន សុភី តំណាងដ៏ខ្ពង់ខ្ពស់ ឯកឧត្តម ស៊ុន សុវណ្ណរិទ្ធិ ប្រធានគណបក្សខេត្ត និងជាប្រធានក្រុមការងារយុវជនគណបក្សខេត្តកំពង់ឆ្នាំង។ 

លោក យិន សាវ៉េន ប្រធានគណៈបក្សប្រជាជនក្រុងកំពង់ឆ្នាំង នៅក្នុងពិធីនេះបានអានរបាយការណ៍ឲ្យដឹ ងថា លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០២០ -២០២១ នៅក្នុងវិទ្យាល័យព្រះបាទសុរាម្រឹត មានបេក្ខជនមកប្រឡងសរុបចំនួន ៤៦២នាក់ ស្រី ២៥៨នាក់ ជាលទ្ធផលប្រឡងជាប់ចំនួន២៧៣ នាក់ ស្រី ១៦០ នាក់ស្មើនិង ៥៩.១០ % ក្នុងនោះនិទ្ទេស A ៧នាក់ ស្រី ៣ នាក់ B ចំនួន ២៤ នាក់ស្រី ១៣ នាក់ C ៣៦នាក់ ស្រី២៤ នា ក់ , D ចំនួន ៨០នាក់ ស្រី ៥៣នាក់និង E ចំនួន ១២៦ នាក់ ស្រី៧១ នាក់ ។ ដោយឡែកសិស្សពូកែប្រឡងជាប់គណិតវិទ្យា សម័យប្រឡងថ្ងៃទី ១៥ ខែមករា ឆ្នាំ២០២២ ពីថ្នាក់ទី៧ ដល់ថ្នាក់ទី ១២ ជាលទ្ធផលទទួលបានមេដៃប្រាក់ចំនួន ៦ នាក់ និងមេដៃសំរឹទ្ធចំនួន១១នាក់ ។

លោកជំទាវ ប៊ន សុភី តំណាងដ៏ខ្ពង់ខ្ពស់ឯកឧត្តម ស៊ុន សុវណ្ណរិទ្ធិ ប្រធានគណបក្សខេត្ត និងជាប្រធានក្រុមការងារយុវជនគណបក្សខេត្ត បានមានប្រសាសន៍ថា ប្អូនៗក្នុងនាមជាសិស្សានុសិស្ស និងជាយុវជនត្រូវកសាងខ្លួនឱ្យក្លាយជាកូនល្អស្ដាប់ពុកម៉ែ និងជាសិស្សពូកែត្រូវស្ដាប់គ្រូ។ ដោយត្រូវខិតខំហាត់ពត់លត់ដំព្យាយាមតស៊ូរៀនសូត្រ ទើបមានអនាគតល្អ ដែលអាចក្លាយជាថ្នាក់ដឹកនាំនានាក្នុងស្ថាប័នជាតិដើម្បីជួយកសាង និងអភិវឌ្ឍន៍ប្រទេសជាតិលើគ្រប់វិស័យ។ ទន្ទឹមនេះដែរ ប្អូនៗត្រូវចូលរួមទាំងអស់គ្នាក្នុងការ គោរពច្បាប់ចរាចរណ៍ ពាក់មួកសុវត្ថិភាព និងចៀសឲ្យឆ្ងាយពីគ្រឿងញៀន កុំប្រព្រឹត្តនូវអំពើខុសច្បាប់នានាដែលនាំឲ្យខូចអនាគតរបស់ខ្លួន។ ហើយត្រូវចូលរួមផ្សព្វផ្សាយនៅក្នុងក្រុមគ្រួសារ និងនៅក្នុងមូលដ្ឋានឲ្យចូលរួមចាក់វ៉ាក់សាំការពារជំងឺកូវីដ-១៩ ឲ្យបានទាំងអស់គ្នា។

ដោយឡែក អំណោយរបស់ឯកឧត្តម ស៊ុន សុវណ្ណរិទ្ធិ ប្រធានគណបក្សប្រជាជនខេត្តកំពង់ឆ្នាំង និងជាប្រធា នក្រុមការងារយុវជនគណបក្សខេត្ត ជូនដល់សិស្សវិទ្យាល័យសុរាម្រឹតរួមមាន សៀវភៅចំនួន ២,៧០០ក្បាល បានជូនដល់សិស្សនិទ្ទេសA និងសិស្សទទួលបានមេដៃប្រាក់ ទទួលបានថវិកាចំនួន ១៥ ម៉ឺនរៀល សៀវភៅ ១០ ក្បាល និងប័ណ្ណសរសើរ១ ច្បាប់ផងដែរ។ ចំណែកសិស្សទទួលបានមេដៃសំរឹទ្ធ ទទួលបានថវិកាចំនួន ១១ ម៉ឺនរៀល និងសៀវ ភៅ ១០ ក្បាលផងដែរ៕