គ្រោះថ្នាក់ចរាចរណ៍រថយន្តបុកម៉ូតូ មនុស្សម្នាក់បានស្លាប់នៅនិងកន្លែងកើតហេតុ

---

កំពង់ឆ្នាំង៖ មនុស្សម្នាក់បានស្លាប់នៅក្នុងករណីគ្រោះថ្នាក់ចរាចរណ៍រថយន្តបុកម៉ូតូ។ ហេតុការណ៍ខាងលើនេះបានកើតឡើងនៅវេលាម៉ោង ១៣ និង ៥០ នាទីរសៀលថ្ងៃទី០៣ ខែកុម្ភៈ ឆ្នាំ២០២២ នៅចំណុចមុខហាងលក់គ្រឿងសមុទ្រម្លប់ឬស្សី លើនៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ ៥០និង៥១ស្ថិតក្នុងភូមិតាកុល ឃុំពានី ស្រុកកំពង់ត្រឡាច។ 

សមត្ថកិច្ចនគរបាលចរាចរណ៍ស្រុកកំពង់ត្រឡាច នៅល្ងាចថ្ងៃទី០៣នេះបានឲ្យដឹងថា ករណីគ្រោះថ្នាក់ចរាច រណ៍នេះកើតឡើងរវាងម៉ូតូC១០០ កូរ៉េ ម៉ូតូឆ្អឹងសុទ្ធគ្មានលេខ អ្នកបើកបរឈ្មោះ កូប សុគឿន ភេទប្រុស អាយុ ៤៦ ឆ្នាំ ជនជាតិខ្មែរ ស្លាប់ នៅនិងកន្លែងកើតហេតុ មានទីលំនៅក្នុងភូមិព្រែកគន្លង ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង បើកបរពីទិសខាងជើងទៅត្បូង។

លុះដល់ចំណុចកើតហេតុក៏បានរេចង្កូតមកឆ្វេង ទៅបុកចូលចំណែកផ្លូវរបស់រថយន្តម៉ាកHYUNDAI ពណ៌សក្រហម ពាក់ផ្លាកលេខកំពង់ឆ្នាំង 3A-1103 អ្នកបើកបរមិនស្គាល់ឈ្មោះ និងអាសយដ្ឋាន ដោយគេបានគេចខ្លួនបាត់ គឺបានបើកបរពីទិសខាងត្បូងឆ្ពោះទៅទិសខាងជើងក្នុងដំណើរច្រាស់ទិសគ្នា។  នៅក្នុងករណីគ្រោះថ្នាក់ចរាចរណ៍នេះ បណ្ដាលមកពីកត្តាមនុស្សអ្នកបើកបរម៉ូតូមិនប្រកាន់ស្ដាំ និងក្នុងពេលផ្លូវជាតិលេខ៥កំពង់ស្ថាបនា ។ ឮ

ករណីនេះ សមត្ថកិច្ចនគរបាលស្រុកកំពង់ត្រឡាច បានធ្វើការវាស់វែងកន្លែងកើតហេតុតាមនីតិវិធី និងនាំយកវត្ថុតាងមករក្សាទុកនៅអធិការដ្ឋាននគរបាលស្រុកកំពង់ត្រឡាចរងចាំដោះស្រាយតាមច្បាប់៕ ចំណែកឯសព ត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី។