លោកជំទាវ ឱ វណ្ណឌីន តំណាងលោកបណ្ឌិតសាស្រ្តាចារ្យ ម៉ម ប៊ុនហេង បើកសិក្ខាសាលា ស្តីពីការអនុវត្តច្បាប់ពាក់ព័ន្ធនឹងការប្រយុទ្ធប្រឆាំងឱសថក្លែងក្លាយ និងអន់គុណភាព

---

ខេត្តកែប ៖ ដោយសារតែនៅក្នុងប្រទេសកម្ពុជាបច្ចុប្បន្នមានការនាំចូលនូវឱសថក្លែងក្លាយក៏ដូចជាឱសថខូចគុណភាពជាច្រើនដែលអាចនឹងបង្កផលប៉ះពាល់ដល់ប្រជាពលរដ្ឋនៅទូទាំងប្រទេស នាថ្ងៃទី១៦ ខែឧសភា ឆ្នាំ២០២២ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានអញ្ជើញជាអធិបតីបើកសិក្ខាសាលា ស្តីពីការអនុវត្តច្បាប់ពាក់ព័ន្ធនឹងការប្រយុទ្ធប្រឆាំងឱសថក្លែងក្លាយ និងអន់គុណភាព នៅសណ្ឋាគាររ៉ក់រ៉ូយ៉ាល់ ខេត្តកែប ដែលប្រព្រឹត្តទៅចាប់ពីថ្ងៃទី១៦ ដល់ថ្ងៃទី១៨ ខែឧសភា ឆ្នាំ២០២២នេះ។

ដើម្បីផ្លាស់ប្តូរបទពិសោធន៍ និងពង្រឹងសមត្ថភាព មន្រ្តីភ្នាក់ងារត្រួតពិនិត្យឱសថក្នុងការបង្ការ ទប់ស្កាត់ ស្រាវជ្រាវ និងចាត់វិធានការផ្លូវច្បាប់ការប្រយុទ្ធប្រឆាំងឱសថ ក្លែងក្លាយ និងអន់គុណភាព។ សិក្ខាសាលានេះមានការចូលរួមធ្វើបទបង្ហាញពីមន្រ្តីនគរបាលយុត្តិធម៌នៃក្រសួងសុខាភិបាល ក្រសួងមហាផ្ទៃ មហាអយ្យការអមសាលាឧទ្ធរណ៍ភ្នំពេញ និងអយ្យការអមសាលាដំបូងខេត្តកណ្តាល ព្រមទាំងអង្គការដៃគូពាក់ព័ន្ធដូចជា អង្គការសុខភាពពិភពលោក និងអង្គការដៃគូជាច្រើនទៀត។ ដោយមានការចូលរួមពីមន្រ្តីភ្នាក់ងារត្រួតពិនិត្យឱសថនៃនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង និងមន្រ្តីភ្នាក់ងារត្រួតពិនិត្យឱសថនៃមន្ទីរសុខាភិបាល រាជធានី-ខេត្តចំនួន១៣ (រាជធានីភ្នំពេញ ខេត្តបន្ទាយមានជ័យ បាត់ដំបង កំពង់ចាម កំពង់ឆ្នាំង កំពង់ស្ពឺ កំពង់ធំ ត្បូងឃ្មុំ កណ្តាល កោះកុង ក្រចេះ មណ្ឌលគិរី និងកែប)។

លោកជំទាវបានលើកឡើងទៀតថា ឱសថគឺជាផ្នែកមួយចាំបាច់មិនអាចខ្វះបានសម្រាប់វិស័យសុខាភិបាល ក្នុងការបង្ការ ថែទាំ និងព្យាបាលសុខភាពប្រជាជនគ្រប់រូប។ ប៉ុន្តែឱសថក្លែងក្លាយ និងអន់គុណភាព គឺជាអាវុធដ៏ស្ងៀមស្ងាត់ ដែលអាចសម្លាប់មនុស្សបាន ព្រោះគុណភាពឱសថមានទំនាក់ទំនងគ្នាយ៉ាងជិតស្និទ្ធទៅនឹងគុណភាពនៃការព្យាបាលផងដែរ ប្រសិនបើ ឱសថមានគុណភាពមិនត្រឹមត្រូវតាមបទដ្ឋានបច្ចេកទេសទេនោះ គុណភាពនៃការព្យាបាល មិនអាចទទួលបានជោគជ័យឡើយ ទោះបីជាគ្រូពេទ្យនោះមានជំនាញយ៉ាងណាក៏ដោយ ហើយវាអាចបង្កឱ្យមានគ្រោះថ្នាក់ខ្ពស់ដល់សុខភាព សុវត្ថិភាពសង្គម និងធ្វើឱ្យរាំងស្ទះដល់កំណើនសេដ្ឋកិច្ចជាតិផងដែរ។

ដើម្បីចូលរួមការប្រយុទ្ធប្រឆាំងឱសថក្លែងក្លាយ និងអន់គុណភាព ក្រសួងសុខាភិបាល បានដាក់ចេញនូវយន្តការគ្រប់គ្រង ត្រួតពិនិត្យឱសថ នៅក្នុងព្រះរាជាណាចក្រកម្ពុជា មានដូចជា៖

− តម្រូវឱ្យចុះទិដ្ឋាការ បញ្ជិកាផលិតផលឱសថ អនុលោមតាមបទដ្ឋានបច្ចេកទេសមុនពេលអនុញ្ញាតឱ្យផលិតផលទាំងនេះដាក់លក់លើទីផ្សារ និងការអប់រំណែនាំដល់សាធារណជនមិនឱ្យប្រើប្រាស់ឱសថដែលគ្មានលេខទិដ្ឋាការ ឬបញ្ជិកាពីក្រសួងសុខាភិបាល។

− ចុះត្រួតពិនិត្យតាមដាន និងស្រាវជ្រាវជាប្រចាំនូវឱសថដែលបានចែកចាយ និងលក់នៅលើទីផ្សារ។

− ចាត់វិធានការតាមផ្លូវច្បាប់នានាពាក់ព័ន្ធនឹងបទល្មើសផ្នែកឱសថ និងគ្រឿសម្អាង។

គួរបញ្ជាក់ផងដែរថា ក្រសួងសុខាភិបាល បានអំពាវនាវដល់គ្រប់គ្រឹះស្ថានលក់ឱសថទាំងអស់ ត្រូវលក់តែឱសថណាដែលមានលេខទិដ្ឋាការ ឬបញ្ជិកា ពីក្រសួងសុខាភិបាល។ ចំណែកឯប្រជាពលរដ្ឋត្រូវបញ្ឈប់ការទិញឱសថ ផលិតផលបំប៉នសុខភាព តាមប្រព័ន្ធអនឡាញ ហើយត្រូវទិញផលិតផលទាំងនេះតែពី ឱសថស្ថានស្របច្បាប់ ដោយត្រូវពិនិត្យមើលនូវលតាប័ត្រទិដ្ឋាការ ឬបញ្ជិកា នៅលើសំបកវេចខ្ចប់ឱសថ ដូចមានទំរង់នៅក្នុងសេចក្តីជូនព័ត៌មានជាហូរហែកន្លងមករបស់ក្រសួងសុខាភិបាល។ ម្យ៉ាងទៀត ក្រសួងសុខាភិបាល សូមឱ្យបងប្អូនប្រជាពលរដ្ឋទាំងអស់ដែលមានជំងឺ ឬបញ្ហាសុខភាពផ្សេងៗ ត្រូវទៅពិគ្រោះជាមួយគ្រូពេទ្យដែលមានជំនាញត្រឹមត្រូវ ដើម្បីទទួលបាន វេជ្ជបញ្ជាសម្រាប់តម្រូវការទិញឱសថប្រើប្រាស់ ដោយមិនត្រូវប្រើប្រាស់ឱសថដោយគ្មានវេជ្ជបញ្ជាឡើយ៕