បុណ្យឆ្លងកុដិ ដងទង់ ថ្នល់បេតុង របងវត្ត និងផ្លូវគ្រោះក្រហមក្នុងវត្ត រត្តនៈ សុខសាន្ដ "អូខៃដន"

---

បន្ទាយមានជ័យ៖ សមិទ្ធផលនានាជាច្រើនក្នុងបរិវេណវត្ត រត្តនៈ សុខសាន្ត "អូខៃដន" ស្ថិតនៅភូមិសុខសាន្ត សង្កាត់និមិត្តក្រុងប៉ោយប៉ែតខេត្តបន្ទាយមានជ័យ រួមមាន កុដិ ដងទង់ ថ្នល់បេតុង របងវត្ត ព្រមទាំងផ្លូវក្រាលគ្រោះក្រហមប្រវែង ៥០០ ម៉ែត្រ ត្រូវបានធ្វើពិធីបុណ្យឆ្លងជាផ្លូវការនាព្រឹកថ្ងៃទី ៩ កើតខែអាសាឍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី ៧ ខែកក្កដាឆ្នាំ ២០២២ ក្រោមអធិបតីភាពឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន និងជាអគ្គមេបញ្ជាការរងកងយុទ្ធពលខេមរៈភូមិន្ទ និងជាមេបញ្ជាការកងទ័ពជើងគោក។

ឯកឧត្តម អ៊ុ រាត្រី អភិបាលខេត្តបន្ទាយមានជ័យបានមានប្រសាសន៍លើកឡើងថា កាលពីដើមឡើយនៅតំបន់ក្បែរវត្តអូរខៃដននេះគឺជាតំបន់ សង្គ្រាមបង្ហូរឈាមរវាងខ្មែរនិងខ្មែរ ដោយសារមានការបែកបាក់ខ្វះភាពសាមគ្គី តែបច្ចុប្បន្ននេះដោយសារនយោបាយឈ្នះឈ្នះរបស់សម្ដេចតេជោ តំបន់នេះក្លាយជាតំបន់អភិវឌ្ឍន៍លើគ្រប់វិស័យ មិនថាពុទ្ធចក្រឬអាណាចក្រ ដូចយើងមើលឃើញស្រាប់នៅសមិទ្ធផលនានាដែលកំពុងធ្វើពិធីបុណ្យឆ្លង ក៏ដូចជាសមិទ្ធផលដែលកំពុងសាងសង់។

មានប្រសាសន៍ថ្លែងក្នុងពិធីបុណ្យឆ្លងសមិទ្ធផលផ្សេងៗនាឱកាសនេះផងដែរ ឯកឧត្តម ហ៊ុន ម៉ាណែត បានពាំនាំប្រសាសន៍ផ្ដាំផ្ញើសាកសួរសុខទុក្ខ ពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ជានិច្ចកាលសម្ដេចទាំងពីរតែងតែនឹករលឹកខ្វាយខ្វល់ពីសុខទុក្ខរបស់បងប្អូនប្រជាពលរដ្ឋគ្រប់កាលៈទេសៈ ជាពិសេសសម្ដេចតែងតែព្រួយបារម្មណ៍ពីបញ្ហាសុខុមាលភាព នៃជំងឺឆ្លងកូវីដ១៩ ដែលរយៈកន្លងមកបានសម្លាប់មនុស្សជាតិខ្មែរយើងទូទាំងប្រទេសប្រមាណជាង ៣.០០០នាក់ តែនៅបច្ចុប្បន្ននេះកម្ពុជាបានធូរស្រាលពីការឆ្លងរីករាលដាលនៃជំងឺនេះ ដោយសារប្រជាពលរដ្ឋយើងបានធ្វើការចាក់វ៉ាក់សាំងការពារ។

ឯកឧត្តម ហ៊ុន ម៉ាណែត បានសំដែងនូវមោទនភាពចំពោះភាពរីកចម្រើនជាលំដាប់នៃវត្តរតនៈសុខសាន្តអូរខៃដននេះនិងសូមការកោតសរសើរ និងអរគុណអរព្រះគុណចំពោះព្រះតេជគុណ ឯកឧត្តម លោកជំទាវ លោកឧកញ៉ា អស់លោកលោកស្រី សប្បុរសជនទាំងអស់រួមសាមគ្គីគ្នា ផ្ដើមក៏សាងបានរួចរាល់នៅសមិទ្ធផលជាច្រើនក្នុងបរិវេណវត្តរតនៈសុខសាន្តអូរខៃដននេះ សម្រាប់ព្រះសង្ឃបានប្រើប្រាស់និងជាកន្លែងទីសក្ការៈគោរពបូជា ហើយក៏ជាចំណែកបុណ្យដ៏ធំមិនអាចកាត់ថ្លៃបាន។មួយវិញទៀតរាល់សមិទ្ធផលដែលកើតមាននាថ្ងៃនេះ គឺផ្តើមចេញពីប្រទេសជាតិយើងមានសុខសន្តិភាពពេញលេញក្រោមគោលនយោបាយឈ្នះ ឈ្នះ របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសជាតិមានការអភិវឌ្ឍនិងរីកចម្រើនលើ្រប់វិស័យ វិស័យពុទ្ធចក្រនិងអាណាចក្រ ។

ជាចុងក្រោយឯកឧត្តមបានធ្វើការអំពាវនាវដល់បងប្អូនប្រជាពលរដ្ឋទាំងអស់ មេត្តាអញ្ជើញទៅចាក់វ៉ាក់សាំងការពារជំងឺឆ្លងកូវីដ១៩ ឱ្យបានគ្រប់ដូស ចាប់ពីអាយុ ៣ ឆ្នាំឡើងទៅ ព្រោះថាកូវីដ១៩ នៅមិនទាន់ផុតរលត់ទៅណាឆ្ងាយពីយើងនៅឡើយ។ ចុងបញ្ចប់នៃកម្មវិធីគណៈធិបតីបានធ្វើការបំពាក់គ្រឿង ឥស្សរៈយស មេដាយ ប័ណ្ណថ្លែងអំណរគុណ ប័ណ្ណសរសើរដល់ព្រះមន្ត្រីសង្ឃព្រះតេជគុណ ឯកឧត្តម លោកជំទាវ លោកឧកញ៉ា សប្បុរសជន អាជីវករ ដែលមានសទ្ធាជ្រះថ្លាជួយកសាងនូវសមិទ្ធផលនានា និងបានចែកជូនអំណោយដល់តាជីយាយជី ៥០នាក់ ម្នាក់ៗទទួលបានក្រណាត់ស ១ ដុំ និងថវិកាមួយចំនួន ៕ ណុប-រក្សា(២៩០១៦)