កម្លាំងសមត្ថកិច្ចចម្រុះ ចុះបង្ក្រាបបានក្រុមឧក្រិដ្ឋជនផលិត និងជួញដូរគ្រឿងញៀន ដ៏ធំមួយកន្លែង នៅក្រុងស្វាយរៀង ដោយរឹបអូសវត្ថុតាងសង្ស័យគ្រឿងញៀន ជាង១តោន
Facebook
Telegram
Twitter
Linkedin
(ខេត្តស្វាយរៀង)៖ កម្លាំងសមត្ថកិច្ចចម្រុះ ចុះបង្ក្រាបបានក្រុមឧក្រិដ្ឋជនផលិត និងជួញដូរគ្រឿងញៀនដ៏ធំមួយកន្លែង នៅក្នុងក្រុងស្វាយរៀង ដោយចាប់រឹបអូសវត្ថុតាងសង្ស័យគ្រឿងញៀន ជាង១តោន និងឃ្លាំងផលិតគ្រឿងញៀន ១កន្លែង ។ ករណីនេះ គឺសមត្ថកិច្ចមន្ទីរប្រឆាំងគ្រឿងញៀន និងសមត្ថកិច្ចផ្សេងទៀតបានសហការឡោមព័ទ្ធ និងបង្ក្រាបតាំងពីថ្ងៃទី៤ ខែកក្កដា ឆ្នាំ២០២២ សប្ដាហ៍មុនមកម្ល៉េះ មិនទាន់ចប់នៅឡើយទេ ។
កិច្ចប្រតិបត្តិការខាងលើនេះ ដឹកនាំដោយកម្លាំងនគរបាលមន្ទីរប្រឆាំងគ្រឿងញៀនក្រសួងមហាផ្ទៃ និងសហការចូលរួមមានមន្ត្រីជំនាញ នៃការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តស្វាយរៀង សម្របសម្រួលដោយលោកព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង ជាម្ចាស់ទឹកដី ចុះពិនិត្យឃ្លាំងមួយកន្លែង ដែលមានស្លាកយីហោ «ម៉ាស៊ីនកិនស្រូវតូចតែពេជ្រ» ដែលមានទីតាំងជាប់ផ្លូវជាតិលេខ១ ស្ថិតនៅភូមិស្វាយ សង្កាត់ចេក ក្រុងស្វាយរៀង បានរកឃើញគ្រឿងញៀន ដែលផលិតសម្រេចជាង១តោន ។
ការចុះបង្ក្រាបនៅវេលាម៉ោង៨:៣០នាទីយប់ ថ្ងៃទី៤ ខែកក្កដា ឆ្នាំ២០២២ នៅចំណុច"ឃ្លាំងរោងម៉ាស៊ីនកិនស្រូវ តូចតែពេជ្រ" រកឃើញវត្ថុតាងសង្ស័យគ្រឿងញៀនប្រមាណ ជាង១តោន និងឃាត់ខ្លួនជនសង្ស័យបានចំនួន៧នាក់ ។ ក្រោយពីធ្វើការសាកសួរចម្លើយលើជនសង្ស័យ ទើបឈានដល់កំណត់ទីតាំងឃ្លាំងផលិតគ្រឿងញៀនដ៏ធំមួយកន្លែងទៀត ។
លុះដល់វេលាម៉ោង៧ព្រឹកថ្ងៃទី៥ ខែកក្កដា ឆ្នាំ២០២២ កម្លាំងសមត្ថកិច្ចចម្រុះ សម្របសម្រួលដោយលោកព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង ចុះទៅឆែកឆេរឃ្លាំងមួយកន្លែងនៅជិតចំណតកាណូតចាស់ ស្ថិតនៅភូមិចុងព្រែក សង្កាត់ស្វាយរៀង លទ្ធផលរកឃើញវត្ថុតតាង ម៉ាស៊ីនគ្រឿងចក្រស្វ័យប្រវត្តិ សម្រាប់ផលិតគ្រឿងញៀនដ៏ធំ កំពុងដំណើរការយ៉ាងសកម្មផលិតគ្រឿងញៀន និងបុគ្គលិក វិស្វករផលិតគ្រឿងញៀន ជនជាតិចិនចំនួន៧នាក់ និងបុគ្គលិកជនជាតិខ្មែរចំនួន៥នាក់ ។
ចំពោះករណីនេះដែរ ឯកឧត្តម តូច ប៉ូលីវ៉ា អភិបាលរងខេត្តស្វាយរៀង និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្ត បបានប្រាប់អោយភ្នាក់ងារយកព័ត៍មានយើងដឹងថា: ករណីនេះ ម្ចាស់សំណុំរឿង គឺនគរបាលមន្ទីរប្រឆាំងគ្រឿងញៀនក្រសួងមហាផ្ទៃ ជាអ្នកគ្រប់គ្រង ដូច្នេះសូមរង់ចាំខាងក្រសួងផ្តល់ព័ត៌មាន និងរបាយការណ៍លទ្ធផលលម្អិត ទើបជម្រាបជូនតាមក្រោយ ។
សូមបញ្ជាក់ផងដែរថា: ចាប់តាំងពីថ្ងៃទី៥ ខែកក្កដា ឆ្នាំ២០២២ រហូតមកដល់ព្រឹកថ្ងៃទី១២ ខែកក្កដា ឆ្នាំ២០២២នេះ ភ្នាក់ងារយកព័ត៌មានយើងពុំទាន់ទទួលបានព័ត៌មានលម្អិតអំពីលទ្ធផលការបង្ក្រាបបទល្មើសគ្រឿងញៀននៅឡើយទេ ដោយសមត្ថកិច្ចដាក់កម្លាំងយាមកាមទីតាំងទាំងពីរខាងលើយ៉ាងយកចិត្តទុកដាក់បំផុត។
ចំណែកព័ត៌មាននៅទីនោះ គ្រាន់តែបង្ហើបឲ្យដឹងថា ក្រុមការងារសមត្ថកិច្ចកំពុងស្រាវជ្រាវ តាមប្រមាញ់មេខ្លោង និងបក្សពួកក្រុមឧក្រិដ្ឋជនផលិត និងជួញដូរសារធាតុញៀន ដោយខុសច្បាប់នេះ៕ ដោយ:PK
