បើកបវេសនកាលឆ្នាំសិក្សាថ្មី ២០២២-២០២៣ នៃសាលា ពុទ្ធិកបឋមសិក្សា ម៉ាចសត្ថារាម មានរិទ្ធិ ស្ថិតនៅវត្ត រតនារាម "ផ្សារកណ្ដាល"

---

បន្ទាយមានជ័យ៖ ចេះពីរៀនមានពីរក នេះគឺជាសង្ឃដីកាលើកឡើងរបស់ ព្រះសិរីនក្ខិតវង្ស តែម ម៉ាច ព្រះគ្រូចៅអធិការវត្តរតនារាម ផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ក្នុងពិធីបើកបវេសនកាលឆ្នាំសិក្សាថ្មី ២០២២-២០២៣ ថ្ងៃទី២២ ខែកក្កដា ឆ្នាំ ២០២២ នៅសាលាពុទ្ធិកបឋមសិក្សា ម៉ាចសត្ថារាម មាន រិទ្ធិ ស្ថិតក្នុងបរិវេណវត្ត រតនារាម ផ្សារកណ្ដាល ដែលមានសមណៈសិស្សជាង ១៥០ អង្គរ នាក់ នឹងចូលសិក្សារៀនសូត្រឲ្យមានចំណេះដឹងទូលំទូលាយ ដើម្បីក្លាយជាអ្នកបន្តវេនដ៏មានសក្កានុពលនាពេលអនាគត។  

ព្រះធម្មញ្ញាណ ប៉ុក ចំរើន ព្រះគ្រូអនុគណក្រុងប៉ោយប៉ែត ព្រះអង្គមានសង្ឃដីកាបញ្ជាក់ថា៖ យោងតាមប្រកាសលេខ ២២៥/២២ របស់អគារធិការដ្ឋាន ពុទ្ធិកសិក្សាជាតិក្នុងឱកាសបើកបវេសនកាលថ្មីឆ្នាំសិក្សា ២០២២-២០២៣ ដើម្បីឲ្យដំណើរការសិក្សាតាមគន្លងថ្មី ប្រព្រឹទ្ធទៅប្រកបដោយប្រសិទ្ធភាពខ្ពស់ សម្រាប់ឆ្នាំសិក្សាថ្មីគឺគ្រប់ភូមិសិក្សា ត្រូវបន្តអនុវត្តវិធានការនានាដែលរាជរដ្ឋាភិបាលបានដាក់ចេញ ដើម្បីចូលរួមប្រយុទ្ធប្រឆាំងនឹងជំងឺកូវីដ-១៩។

លោក បៀវ ថាន ប្រធានមន្ទីរធម្មការនិងសាសនាខេត្តបន្ទាយមានជ័យមានប្រសាសន៍ថា៖ ការសិក្សារៀនសូត្រជាមូលដ្ឋានគ្រឹះដ៏រឹងមាំ ជាថ្នាលបណ្ដុះបណ្ដាលធនធានមនុស្ស ទាំងពុទ្ធចក្រនិងអាណាចក្រ។ដូច្នេះធ្វើការផ្តាំផ្ញើដល់សមណៈសិស្សទាំងអស់ ត្រូវខិតខំរៀនសូត្រនិងស្រាវជ្រាវឱ្យបានខ្ជាប់ខ្ជួន ចូលរួមយ៉ាងសកម្មក្នុងការកសាងអំពើល្អ ជាពិសេសគោរពឱ្យបានខ្ជាប់ខ្ជួននូវ អភិសមាចារិកវត្ត នឹងជៀសឱ្យផុតការប្រព្រឹត្ត អំពើអបាយមុខផ្សេងៗ និងគ្មានការសេពគ្រឿងញៀនជាដើម។

ជាចុងក្រោយ លោក បៀវ ថាន ក៏ថ្លែងនូវអំណរគុណនិងអំណរព្រះគុណ ចំពោះព្រះថេនានុថេរៈគ្រប់ព្រះអង្គ បានខិតខំបង្កើតសាលារៀននិងសូមអរគុណចំពោះឯកឧត្តម លោកជំទាវ លោកឧកញ៉ា ពុទ្ធបរិស័ទ សប្បុរសជន អាជីវករ តែងតែបរិច្ចាគចូលរួមចំណែក កសាងធនធានមនុស្ស ចំណេះដឹងនូវពុទ្ធិកសិក្សា ឱ្យមានដំណើរការរៀនសូត្រទទួលបានចំណេះដឹង ពិតប្រាកដនិងមានប្រសិទ្ធភាព។ បន្ទាប់មក គណៈធិបតីក៏បានប្រគេននូវសម្ភារៈសិក្សាដល់សមណៈសិស្សទាំង ១៥០ អង្គរ នាក់៕បន្ទាយមានជ័យ,២២/០៧/០២២=ណុប-រក្សា(២៩០១៦)