នាវាកងទ័ពជើងទឹកដ៏ធំសំបើមរបស់ប៉ាគីស្ថាន បានបើកចូលដល់កំពង់ផែស្វ័យ័តព្រះសីហនុ ដើម្បីបំពេញទស្សនកិច្ច រឹតចំណងមិត្តភាព

---

ព្រះសីហនុ៖ នាវាដ៏ធំមានបណ្តោយ ១៣៤.១ម៉ែត្រ ទទឹង១៦ម៉ែត្រ មានជម្រៅទឹក ៧ម៉ែត្រ ទម្ងន់ផ្ទុក ៤,០៤៦តោន និងមាននាវិកសរុបចំនួន ១៦៩នាក់ ដឹកនាំដោយ លោកវរនាវីឯក MUHAMMAD YARSIR TAHIR មេបញ្ជាការនាវា ក្នុងគោលបំណងដើម្បីធ្វើទស្សនកិច្ចនៅកម្ពុជា ចាប់ពីថ្ងៃទី២៥ ដល់ថ្ងៃទី២៨ ខែកក្កដា ឆ្នាំ២០២២ (រយៈពេល៤ថ្ងៃ)។ នេះបើយោងតាមរបាយការណ៍ដែលយើងទទួលបាននៅថ្ងៃទី ២៥ ខែកក្កដា នេះ។ 

បើតាមការឲ្យដឹងពីនាយកដ្ឋាននគរបាលការពារព្រំដែនទឹក នៃអគ្គស្នងការដ្ឋាននគរបាលជាតិ បានបញ្ជាក់ឱ្យដឹងថា នាវាចម្បាំងកងទ័ពជើងទឹកប៉ាគីស្ថាន ចំនួន១គ្រឿង ឈ្មោះ PNS TAIMUR Warship (F-262) បានចូលចតនៅកំពង់ផែស្វយ័ត ក្រុងព្រះសីហនុ ខេត្តព្រះសីហនុ នៅព្រឹកថ្ងៃទី ២៥ ខែកក្កដាឆ្នាំ ២០២២ នេះ។

លោកឧត្តមនាវីត្រី អ៉ិន សុខេមរ៉ា នាយសេនាធិការរងមូលដ្ឋានសមុទ្រ និងនាយនាវីជាច្រើនរូប បានអញ្ជើញទៅទទួលស្វាគមន៍នាវាចម្បាំងកងទ័ពជើងទឹកប៉ាគីស្ថាន ១គ្រឿងនេះ ក្រោយបានចូលចតនៅកំពង់ផែស្វយ័ត ក្រុងព្រះសីហនុ។

កាលពីថ្ងៃទី០៥ ខែកក្កដាកន្លងទៅនេះ ក៏មាននាវាចម្បាំងនៃកងទ័ពជើងទឹកភូមិន្ទថៃ ចំនួន ១គ្រឿង ឈ្មោះ រតនៈកូស៊ីន (HTMS Rattanakosin FS-441) បានចូលចតនៅកំពង់ផែស្វយ័ត ក្រុងព្រះសីហនុផងដែរ ក្នុងគោលបំណងរឹតចំណងមិត្តភាព និងពង្រឹងកិច្ចសហប្រតិបត្តិការល្អរវាងកងទ័ពជើងទឹកនៃប្រទេសទាំងពីរ។ នាវានោះមានបណ្តោយ ៧៦.៨២ម៉ែត្រ ទទឹង៩.៥៥ម៉ែត្រ ជម្រៅទឹក៤.៥០ម៉ែត្រ មានទម្ងន់ផ្ទុក ៩៦២តោន និងមាននាវិកចំនួន ៩២នាក់ ដឹកនាំដោយលោកឧត្តមនាវីទោ អាថន ឆរ:ភីនយ៉ូ មេបញ្ជាការរង នៃបញ្ជាការដ្ឋានយោធភូមិភាគ១ នៃកងទ័ពជើងទឹកភូមិន្ទថៃ។

គួរបញ្ជាក់ដែរថា កាមកដល់នៃនាវាទាំងនេះគឺដើម្បីរឹតចំណងមិត្តភាពបន្ថែមទៀត រវាងកងទ័ពជើងទឹកកម្ពុជា និងកងទ័ពជើងទឹកតាមបណ្ដាលប្រទេសជាមិត្តដើម្បីពង្រឹងនូវទំនាក់ទំនងឱ្យកាន់តែស្អិតរមួត និងស្វែងរកសន្តិភាពទាំងអស់គ្នា៕ អត្ថបទ: ប្រសិទ្ធ