លោកស្រីប្រធានសភាអាមេរិកលើកឡើងថា គោលនយោបាយចិនតែមួយមិនអាចប្រែប្រួលឡើយ

---

ទោះបីជាមានការប្រកាសនូវជំហរយ៉ាងរឹងមាំក៏ដូចជាការបង្ហាញនូវសាច់ដុំដ៏ខ្លាំងក្លាយ៉ាងណារបស់ប្រទេសចិន ដំណើរទស្សនកិច្ចរបស់លោកស្រីប្រធានសភាអាមេរិកនៅតែមកដល់កោះតៃវ៉ាន់ដោយសុវត្ថិភាព។ ក្រោយពេលមកដល់កោះតៃវ៉ាន់មិនបានយូរប៉ុន្មានផង លោកស្រីប្រធានសភាតំណាងរាស្ត្រអាមេរិក ណាន់ស៊ី ផេឡូស៊ី និងសេតវិមានបានអះអាងថា «គោលនយោបាយចិនតែមួយ» របស់ សហរដ្ឋអាមេរិក មិនបានផ្លាស់ប្ដូរ ដោយសារតែការបំពេញដំណើរទស្សនកិច្ចរបស់លោកស្រី ផេឡូស៊ីទៅកាន់កោះតៃវ៉ាន់ ដែលកំពុងធ្វើឱ្យចិន ក្ដៅស្លឹកត្រចៀកនោះទេ។ នេះបើយោងតាមការចេញផ្សាយរបស់សារព័ត៌មានអន្តរជាតិដើរយើងទទួលបាននៅថ្ងៃពុធ ទី៣ ខែសីហា ឆ្នាំ២០២២។ 

លោកស្រី ផេឡូស៊ី បានធ្វើដំណើរទៅដល់កោះតៃវ៉ាន់ ដោយសុវត្ថិភាពកាលពីយប់ថ្ងៃអង្គារម្សិលមិញ ហើយក្រុមសមាជិកសភាអាមេរិកទាំង២ រាប់សិបនាក់ ទាំងមកពីគណបក្សប្រជាធិបតេយ្យ និងគណបក្សសាធារណរដ្ឋ បានចេញសេចក្ដីថ្លែងការណ៍គាំទ្រដំណើរទស្សនកិច្ចរបស់លោកស្រី ផេឡូស៊ី។ លោកប្រធានាធិបតី ចូ បៃដិន ដែលត្រូវបានគេរាយការណ៍ថាមិនទាន់បាននិយាយជាមួយលោកស្រីឡើយ ចាប់់តាំងពី ប្រធានសភាតំណាងរាស្ត្ររូបនេះចេញដំណើរឆ្ពោះមកតំបន់ឥណ្ឌូប៉ាស៊ីហ្វិក។

លោកស្រីផេឡូស៊ីដែរ និងសេតវិមាន តាមរយៈអ្នកនាំពាក្យលោក ចន ឃឺប៊ី ក៏បានបញ្ជាក់ដែរថាលោកស្រី ផេឡូស៊ី មានសិទ្ធិបំពេញ ទស្សនកិច្ចនៅតៃវ៉ាន់ ដោយការសម្រេចចិត្តផ្ទាល់ខ្លួនរបស់គាត់ ព្រោះសភាអាមេរិកគឺជាស្ថាប័ននិតិបញ្ញាត្តិមិនចំណុះឱ្យរដ្ឋាភិបាល។ ប៉ុន្តែ លោក ឃឺប៊ី នៅតែសង្កត់ធ្ងន់ថាគោលនយោបាយចិនតែមួយរបស់សហរដ្ឋអាមេរិកមិនបានផ្លាស់ប្ដូរឡើយ ហើយទីក្រុងវ៉ាស៊ីនតោនមិនគាំទ្រឱ្យតៃវ៉ាន់ប្រកាស ឯករាជ្យឡើយ។

ចំណែកឯអង្គភាពសារដល់ព័ត៌មានអន្តរជាតិមួយទៀតឈ្មោះថា Washington Post ភ្លាមៗក្រោយទៅដល់តៃវ៉ាន់ លោកស្រីផេឡូស៊ី បានគូសបញ្ជាក់ពីច្បាប់ទំនាក់ទំនងតៃវ៉ាន់ ដែលនៅក្រោមច្បាប់នេះសហរដ្ឋអាមេរិកបានប្ដេជ្ញាចិត្តជួយតៃវ៉ាន់ឱ្យមានសមត្ថភាពការពារខ្លួន។ «ថ្ងៃនេះ សហរដ្ឋអាមេរិកត្រូវតែចងចាំចំពោះការប្ដេជ្ញាចិត្តនេះ។ យើងត្រូវឈរនៅជាមួយតៃវ៉ាន់ដែលជាកោះមួយមានការតស៊ូបំផុត»។ នេះជាការ បញ្ជាក់របស់លោកស្រីផេឡូស៊ី។

រដ្ឋាភិបាលចិនបានចាត់ទុកដំណើរទស្សនកិច្ចរបស់លោកស្រី ផេឡូស៊ី មកកាន់កោះតៃវ៉ាន់ជាទង្វើបង្កហេតុ ហើយបានប្រកាសធ្វើសមយុទ្ធ យោធាឡោមព័ទ្ធតៃវ៉ាន់ ចាប់ពីថ្ងៃទី៤ ដល់ថ្ងៃទី៧ ខែសីហានេះ។ លោកស្រី ផេឡូស៊ី មានអាយុ ៨២ឆ្នាំ គឺជាមនុស្សសំខាន់ទី២ បន្ទាប់ពីអនុប្រធានាធិបតីអាមេរិក ដែលអាចស្នងតំណែងជាប្រធានាធិបតី ហើយដំណើរទស្សនកិច្ចនៅពេលនេះបានធ្វើឱ្យលោកស្រី ក្លាយជាប្រធានសភាតំណាងរាស្ត្រអាមេរិកដំបូងគេ ដែលបំពេញទស្សនកិច្ចនៅតៃវ៉ាន់ ក្នុងរយៈពេលជាង២៥ឆ្នាំមកនេះ។

គូរបញ្ជាក់ដែរថា នៅក្នុងពេលវេលាដ៏តានតឹងដែលយន្តហោះដឹកលោកស្រី ផេឡូស៊ី ប្រជាសភាអាមេរិកចុះចតនៅក្នុងទឹកដីកោះតៃវ៉ាន់ ក៏មានការប្រុងជើងការខ្ពស់ពីកងកម្លាំងប្រដាប់អាវុធរបស់កោះតៃវ៉ាន់ ដូចជាកងកម្លាំងអាវុធដែលជាជំនួយរបស់អាមេរិកផងដែរ។ ប៉ុន្តែយ៉ាងណាក៏ដោយរហូតមកទល់នឹងពេលនេះ មិនមានបាតុភាពអ្វីដែលធ្វើឲ្យប៉ះពាល់ដំណើរទស្សនកិច្ចរបស់លោកស្រី ផេឡូស៊ី នោះទេ៕ អត្ថបទ: ប្រសិទ្ធ