ឯកឧត្តម​ ខ្លូត​ ចិន្តា​ បានស្នេីដល់មន្ត្រីអបរំឲ្យរួមគ្នា​ ដើម្បីអនុវត្តឲ្យមានភាព​ ក្នុងការទប់ស្កាត់អំពេីហិង្សាលើកុមារឲ្យបានទាន់ពេលវេលា

---

កំពង់ចាម៖ ឯកឧត្តម​ ខ្លូត​ ចិន្ដា​ អភិបាល​រងខេត្តកំពង់ចាម​ បាន​ស្នើដល់​មន្រ្តី​អប់រំ​ទាំងអស់​ ឲ្យារួមគ្នាពិភាក្សា រិះរក និងកំណត់អំពីតួនាទីរបស់អ្នកពាក់ព័ន្ធចាប់ពីថ្នាក់ខេត្ត រហូតដល់ថ្នាក់ស្រុក ឃុំ កម្រង សាលារៀន និងគណៈគ្រប់គ្រងសាលារៀន និងបង្កើតយន្តការនានា ឬពង្រឹងយន្តការដែលមានស្រាប់នៅថ្នាក់ ឃុំ និងសាលារៀន ដើម្បីអនុវត្តឲ្យមានភាព ស៊ីចង្វាក់ និងប្រទាក់ក្រឡាគ្នា ក្នុងការទប់ស្កាត់ និងឆ្លើយតបទៅនឹងករណីហិង្សាលើកុមារឲ្យបានទាន់ពេលវេលា។​ ការ​ថ្លែង​បែប​នេះ​ក្នុង​កិច្ច​ប្រជុំ​ចាប់ផ្ដើម​អនុវត្ត​គម្រោង​លុបបំបាត់​អំពើ​ហិង្សា​លើ​កុមារ​នៅ​ក្នុង​សាលារៀន​ នាព្រឹក​ថ្ងៃទី​១០​ ខែសីហា​ ឆ្នាំ​២០២២​ នៅ​មន្ទីរ​អប់រំ​ យុវជន​ និង​កីឡា​ខេត្តកំពង់ចាម​ ។  

ក្នុងពិធីនោះដែរ​ ឯកឧត្តមអភិបាល​រងខេត្ត​ បានលេីកឡេីងថា​​ បញ្ហាអំពើហិង្សាក្នុង គ្រួសារ ក្នុងសង្គម ការរំលោភបំពាន និងកេងប្រវ័ញ្ចនានា គ្រប់ទម្រង់ និងគ្រប់រូបភាព នៅតែជាបញ្ហាចោទ ជាពិសេសនៅតាមសហគមន៍។​ ចំពោះអំពើហិង្សាលើកុមារក្នុងសហគមន៍ ក៍ដូចកុមារនៅតាមសាលារៀន នៅតែកើត មានជាហូរហែ ទោះមានករណីច្រើនក្តី តិចក្តីនៅតាមតំបន់ខុសៗគ្នា។ ករណីនេះ ធ្វើឲ្យប៉ះពាល់ដោយ ផ្ទាល់ដល់ សុខភាព ការអភិវឌ្ឍរាងកាយ បញ្ញា ស្មារតី និងការអប់រំរបស់កុមារក្នុងបច្ចុប្បន្ន និងប៉ះពាល់ ដល់ការអភិវឌ្ឍប្រកបដោយសក្តានុពលរបស់កុមារនៅពេលពេញវ័យនាថ្ងៃអនាគត។

ជាមួយគ្នា​នោះ​ ឯកឧត្ដម​ ខ្លូត​ ចិន្ដា​ ក៏បាន​សម្តែង​នូវ​ការអបអរសាទរចំពោះវត្តមានគម្រោង “លុបបំបាត់អំពើហិង្សាលើកុមារនៅក្នុងសាលារៀន" ក្នុងខេត្តកំពង់ចាម ដែលឧបត្ថមថវិកា ដោយក្រសួងការបរទេសជប៉ុន និងអនុវត្តដោយអង្គការសង្គ្រោះកុមារ សហការជាមួយក្រសួងអប់រំ យុវជន និងកីឡា ជាពិសេស មន្ទីរអប់រំ យុវជន និងកីឡាខេត្ត ដែលបានអនុវត្តនៅសាលាបឋមសិក្សាគោលដៅទាំង៤៣ ស្ថិតក្នុងកម្រងទាំង៨ នៃស្រុកកងមាស ខេត្តកំពង់ចាម​ គឺពិតជាបានរួមចំណែកដល់កិច្ច ខិតខំប្រឹងប្រែងរបស់រាជរដ្ឋាភិបាលកម្ពុជា ក៏ដូចជាមន្ទីរអប់រំ ការិយាល័យអប់រំ និងភាគីពាក់ព័ន្ធនានា នៅថ្នាក់ក្រោមជាតិ ដើម្បីសម្រេចឲ្យបាននូវការលើកកម្ពស់ការគោរពសិទ្ធិកុមារ និងឈានសម្រេចឲ្យកុមារ ទទួលបានការអភិវឌ្ឍប្រកបដោយសក្តានុពល នៅពេលពេញវ័យ ៕