អាជ្ញាធរក្រុងប៉ោយប៉ែត អំពាវនាវដល់ពលរដ្ឋរស់នៅតាមមាត់អូរព្រំដែនកម្ពុជា-ថៃ ត្រូវបង្កើនការប្រុងប្រយត្ន័ ខណៈស្ថានភាពទឹកអូរព្រំដែនកំពុងហក់ឡើងខ្លាំង

ប៉ោយប៉ែត៖ ក្រោយពីមានភ្លៀងធ្លាក់ជាបន្តបន្ទាប់ជាច្រើនថ្ងៃនោះមក បានធ្វើឲ្យស្ថានភាពទឹកអូរព្រំដែនហក់ឡើងខ្ពស់ គួរឲ្យព្រួយបារម្ភ ។ ដើម្បីទ្រោលនឹងស្ថានការណ៍នេះ នៅព្រឹកថ្ងៃទី១៦ ខែសីហា ឆ្នាំ២០២២ លោក គាត ហ៊ុល អភិបាលក្រុងប៉ោយប៉ែត បានដឹកនាំក្រុមការងារ និងកម្លាំងនគរបាល យោធា កងរាជអាវុធហត្ថ ចុះពិនិត្យស្ថានភាពទឹកតាមបណ្តោយអូរព្រំដែនកម្ពុជា-ថៃ ក្នុងភូមិសាស្ត្រភាគខាងត្បូងផ្លូវជាតិលេខ៥ ខណៈទឹកភ្លៀងមួយភាគជាទឹកហូរធ្លាក់មកពីប្រទេសថៃ ដែលអាចប្រឈមឲ្យមានការជន់លិចលំនៅដ្ឋាន និង ផលដំណាំរបស់ប្រជាពលរដ្ឋ។

លោក គាត ហ៊ុល អភិបាលក្រុងប៉ោយប៉ែត បានថ្លែងថា៖ ដើម្បីទ្រោលនឹងសភាពការណ៍ទឹកជំនន់ ខ្ញុំបាទបានដឹកនាំក្រុមការងារកម្លាំងចម្រុះថ្នាក់ក្រុង ចុះត្រួតពិនិត្យស្ថានភាពទឹកតាមបណ្តោយអូរព្រំដែនក្នុងភូមិសាស្ត្រក្រុងប៉ោយប៉ែត ដែលកំពុងមានសន្ទុះកើនឡើងដោយសារភ្លៀងធ្លាក់ជាបន្តបន្ទាប់ ដើម្បីត្រៀមលក្ខណៈអន្តរាគមន៍បង្ការ និងជម្លៀសពលរដ្ឋមកកាន់ទីទួលសុវត្ថិភាពដែលបានរៀបចំរួចជាស្រេចក្នុងករណីចាំបាច់។

ក្នុងនាមអាជ្ញាធរក្រុង ខ្ញុំសូមអំពាវនាវដល់បងប្អូនប្រជាពលរដ្ឋដែលមានលំនៅដ្ឋានតាមបណ្តោយមាត់អូរព្រំដែនសូមមានការយកចិត្តទុកដាក់និងប្រុងប្រយ័ត្នខ្ពស់លើសុវត្ថិភាព ជាពិសេសចំពោះកុមារ តូចៗ និងសត្វអសិរពិសផ្សេងៗដែលអាចបង្ករគ្រោះថ្នាក់ជាយថាហេតុ។

គួរំលឹកថា នៅទីក្រុងប៉ោយប៉ែតមានភ្លៀងធ្លាក់០២ថ្ងៃជាប់ៗគ្នាចាប់ពីថ្ងៃទី១៥និង១៦ខែសីហាឆ្នាំ២០២២នេះគេមើលឃើញថា តំបន់មួយចំនួនមានការជន់លិចផ្ទះពលរដ្ឋរួមទាំងផ្លូវផងដែរក្នុងនោះអាជ្ញាធរក៏មានការមម៉ាញឹកកាយប្រឡាយរំដោះទឹកជំនន់ទឹកភ្លៀងនេះដើម្បីបញ្ជៀស ការជន់លិចលំនៅដ្ឋានពលរដ្ឋផងដែរ ៕បន្ទាយមានជ័យ,១៦/០៨/០២២=ណុប-រក្សា(២៩០១៦)