ពិធីផ្សព្វផ្សាយ ការដាក់ឱ្យអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គល ទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្ដីពីការងារ

---

បន្ទាយមានជ័យ៖ នៅថ្ងៃទី២៤ ខែសីហា ឆ្នាំ២០២២ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក បេឡាជាតិសន្តិ សុខសង្គម បានអញ្ជើញ ជាអធិបតីភាព ក្នុងពិធីផ្សព្វផ្សាយ ការដាក់ឱ្យអនុវត្តរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្ដីពីការងារ ក្នុងនោះក៏មានការអញ្ជើញចូលរួមឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ រួមនឹងមានការចូលរួមសំណាក់អគ្គនាយករង បេឡាជាតិសន្តិសុខសង្គម លោក លោកស្រី តំណាងមន្ទីរ និងអង្គភាពពាក់ព័ន្ធជុំវិញខេត្ត លោក លោកស្រី នាយក ម្ចាស់រោងចក្រ សហគ្រាស គ្រឹះស្ថាន ទូទាំងខេត្ត ។ ពិធីនេះបានធ្វើឡើងនៅសាលប្រជុំ(ធំ)សាលាខេត្តបន្ទាយមានជ័យ ។  

ឯកឧត្តម អ៊ុំ រាត្រី អភិបាលខេត្តលើកឡើងថា ៖ ការផ្សព្វផ្សាយដាក់ឱ្យអនុវត្ត របបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយ ស្ថិតក្រោមបទប្បញ្ញាតិ្ត នៃច្បាប់ស្តីពីការងារ ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្ដេច តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្វើឱ្យកម្ពុជាមានសុខសន្តិភាព ស្ថិរភាព ម៉ាក្រូសេដ្ឋកិច្ច ធានាដល់ការរីកចម្រើនគ្រប់វិស័យ និងកំពុងប្រែមុខមាត់ថ្មីលើឆាកអន្តរជាតិ។

ឯកឧត្តម អភិបាលខេត្ត ក៏បានបញ្ជាក់ថា ទន្ទឹមនឹងការរីកចម្រើនឥតឈប់ឈរប្រព័ន្ធសន្តិសុខសង្គម គឺជាកត្តាសំខាន់ ដើម្បីសម្រេចបាននូវក្របខណ្ឌគោលនយោបាយជាតិគាំពារសង្គមរបស់រាជរដ្ឋាភិបាលឆ្នាំ២០១៦-២០២៥ដែលប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូល ខ្ពស់នៅឆ្នាំ២០៥០។ ប្រព័ន្ធសន្តិសុខសង្គម ជាប្រព័ន្ធសម្រាប់គ្រប់គ្រងកម្មវិធីសន្តិសុខសង្គមដែលរៀបចំឡើងដើម្បីជួយដល់ប្រជាជនក្នុងការការពារពួកគាត់នៃការធ្លាក់ចុះភ្លាមៗនៃប្រាក់ចំណូល ដែលបណ្ដាលមកពីជំងឺ លំហែរមាតុភាព គ្រោះថ្នាក់ការងារ និកម្មភាព ទុព្វលភាព ជរាភាព ចូលនិវត្តន៍ និងមរណភាព អ្នកដែលរកចំណូលសម្រាប់គ្រួសារ និងជំរុញឱ្យប្រជាពលរដ្ឋគ្រប់រូបចូលរួមសន្សំប្រាក់ឬបង់វិភាគទាន ជាកាតព្វកិច្ចទៅតាមអត្រាជាក់លាក់នៅក្នុងមូលនិធិ ដើម្បីការពារហានិភ័យ ចូលរួមលើកកម្ពស់និងអនុវត្តនូវគោលនយោបាយជាតិគាំពារសង្គមឆ្នាំ២០១៦-២០២៥ របស់រាជរដ្ឋាភិ បាល ក៏ដូចជា ៖ ការអនុវត្តការងាររបស់ខ្លួន។

ថ្លែងនាឱកាសនោះដែរ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក បេឡាជាតិសន្តិ សុខសង្គម ក៏បានលើកឡើងថា ៖ ការបើកវគ្គផ្សព្វផ្សាយ គឺជាយុទ្ធនាការ៩០ថ្ងៃក្នុងការផ្សព្វផ្សាយគោលនយោបាយរបស់រាជរដ្ឋាភិបាល ក៏ដូចជាអត្ថប្រយោជន៍ សិទ្ធិ និងកាតព្វកិច្ចរវាងបងប្អូនកម្មករ និយោជិត និងនិយោជក រួមទាំងការទទួលបាន ពីការអនុវត្តរបបសន្តិសុខសង្គមផ្នែកប្រាក់សោធន ជាវិធីមួយដ៏មានអត្ថន័យ និងជាប្រវត្តិសាស្រ្ត នៃវិស័យសន្តិសុខសង្គមប្រទេសកម្ពុជា។ បញ្ហានេះត្រូវបានគិតគូរពីរាជរដ្ឋាភិបាលកម្ពុជា ដែលបានអនុម័តច្បាប់ ស្តីពីរបបសន្តិសុខសង្គមកាលពីថ្ងៃទី២ ខែវិច្ឆិកា ឆ្នាំ២០១៩ ដោយកំណត់ឱ្យបេឡាជាតិសន្តិសុខសង្គមហៅ កាត់ថា (ប.ស.ស) នៃក្រសួងការងារ និងបណ្ដុះបណ្ដាល គឺជាស្ថាប័នប្រតិបត្តិករតែមួយគត់អនុវត្តរបបសន្តិសុខសង្គម នៃព្រះរាជាណាចក្រកម្ពុជា រួមមានផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន និងផ្នែកនិកម្មភាពការងា។

ឯកឧត្តម បានបន្តថា ៖ សម្រាប់"ជំហានឆ្ពោះទៅកាន់ការអភិវឌ្ឍប្រព័ន្ធសន្តិសុខសង្គមពេញលេញនៅកម្ពុជា" និងជាចំណែកក្នុងការអភិវឌ្ឍប្រព័ន្ធគាំពារសង្គមមួយដ៏រឹងមាំប្រកបដោយចីរភាព និង បរិយាប័ន្ន ដើម្បីជាប្រយោជន៍ សម្រាប់ប្រជាជនគ្រប់ក្រុមគោលដៅ ជាពិសេសការបង្ការហានិភ័យខ្ពស់ នៃការធ្លាក់ចូលក្នុងភាពក្រីក្រនៅពេលចូលដល់វ័យចាស់ជរា៕ បន្ទាយមានជ័យ,២៥/០៨/០២២= ណុប-រក្សា (២៩០១៦)