ប្រធានក្រុមការងាររាជរដ្ឋាភិបាលចុះជួយក្រុងស្វាយរៀងគាំទ្រ និង​លើកទឹកចិត្ត ដល់​វិស័យ​ឯកជន​ទាំងអស់ នៅក្នុង​ខេត្តស្វាយរៀង ដែល​វិនិយោគ​វវិស័យអចលនទ្រព្យដីនិង ផ្ទះល្វែង

---

(ស្វាយរៀង)៖ ឯកឧត្តម ជុក មុន្នី រដ្ឋលេខាធិការក្រសួងមុខងារសាធារណៈ និងប្រធានក្រុមការងាររាជរដ្ឋាភិបាលចុះជួយមូលដ្ឋានក្រុងស្វាយរៀង បានថ្លែងថា ក្នុងនាមក្រុមការងាររាជរដ្ឋាភិបាលចុះជួយក្រុងស្វាយរៀងក៏ដូចជាក្នុងនាមអាជ្ញាធរ សូមលើកទឹកចិត្តដល់វិស័យវិនិយោគឯកជនទាំងអស់នៅខេត្តស្វាយរៀង ដែលមានបំណងចង់វិនិយោគលើវិស័យអចលនទ្រព្យមានដីធ្លី ផ្ទះល្វែងដែលមានតម្លៃសមរម្យ នៅក្រុងស្វាយរៀង ស្រប​ពេលដែល​ប្រទេសជាតិ មាន​សុខសន្តិភាព និង​ការអភិវឌ្ឍ លើ​គ្រប់​វិស័យ ដែលជា​ឱកាស​មួយ សម្រាប់​អ្នកវិនិយោគទុន​ទាំងអស់ មក​បណ្តាក់ទុន​រកស៊ី​នៅ​ខេត្តស្វាយរៀង។  

ការថ្លែងបែបនេះរបស់ឯកឧត្តម ជុក មុន្នី បានធ្វើឡើងនៅក្នុងពិធីក្រុងពាលីសុំទឹក សុំដី សុំជោគ សុំជ័យ សិរីសួស្តី ក្នុងការបុកគ្រឹះសាងសង់ផ្ទះល្វែង ស្ថិតភូមិចំបក់ សង្កាត់ចេក ក្រុងស្វាយរៀង ខេត្តស្វាយរៀង នៅថ្ងៃទី២៩ ខែសីហា ឆ្នាំ២០២២។

ឯកឧត្តម ជុក មុន្នី បានបន្តថា អាជ្ញាធរតែងតែ​ជំរុញ និង​សហការ ក្នុង​ការផ្តល់​ទំនុកចិត្ត ចំពោះ​ការអភិវឌ្ឍហើយរាល់​ការវិនិយោគ វិស័យ​ឯកជន ពិតជា​បានរួម​ចំណែក នូវគោលនយោបាយ កាត់បន្ថយ​ភាព​ក្រី​ក្រី ជាមួយ​រាជរដ្ឋាភិបាល បាន​មួយកម្រិត ដូចជា បានផ្តល់​នូវ​លំនៅឋានមានតម្លៃសមរម្យ ជាពិសេសបានផ្តល់​ការងារ ដល់​ប្រជាពលរដ្ឋផងដែរ​។

លោក រៀម សុីណា ដែលជាម្ចាស់គម្រោងផ្ទះល្វែង សូមស្វាគមន៍យ៉ាងកក់ក្តៅ និងថ្លែងអំណអរគុណយ៉ាងជ្រាលជ្រៅ ចំពោះវត្តមាន ឯកឧត្តម លោកជំទាវ លោក លោកស្រីភ្ញៀវកិត្តិយសទាំងអស់ ដែលបានចំណាយពេលចូលរួមនៅក្នុងកម្មវិធីក្រុងពាលី ក្នុងការបុកគ្រឹះសាងសង់ផ្ទះល្វែងនេះផងដែរ។

លោកបានបន្តថា ការសាងសង់ផ្ទះល្វែងនេះមិនមែនសាងសង់សម្រាប់ធ្វើអាជីវកម្មទេ គឺជាការចែករំលែក និងផ្សព្វផ្សាយកេរ្ត៍ឈ្មោះនៃគម្រោង អ្វីដែលគម្រោងយើងគិត គឺទៅលើក្តីសុបិន្ត និងគោលដៅរបស់អតិថិជន ប្រកបដោយសុខដុមរមនា ឬប្រកបអាជីវកម្មទទួលបាននូវភាពជោគជ័យ សំខាន់គឺផ្តល់នូវតម្លៃសមរម្យ និងលក្ខខ័ណ្ឌងាយៗជូនចំពោះអតិថិជនសម្រាប់ជាការរស់នៅ ការធ្វើអាជិវកម្ម និងការទិញទុកចំណេញ។

លោកបានបន្ថែមថា ចំពោះផ្ទះល្វែងនេះ អិតថិជនអាចចំណេញបាន២ដង គឺចំណេញពេលទិញ និងចំណេញពេលលក់(នេះសម្រាប់បងប្អូនដែលរកស៊ីលើវិស័យអចលនទ្រព្យ)។

លោកបានលើកឡើងចំនួន៣ចំណុចសំខាន់ ទី១៖ ទីតាំងដែលមានសត្តានុពលមានស្រាប់ មានដូចជាផ្លូវ អគ្គិសនី និងទឹកស្អាត។  ទី២៖ គុណភាពសំណង់ សម្រាប់គម្រោងផ្ទះល្វែងនេះគូសប្លង់ និងតាមដានការសាងសង់ដោយវិស្វករ និងស្ថាបត្យកម្ម ដែលមានជំនាញច្បាស់លាស់ដែលកំពុងធ្វើការនៅក្នុងស្ថាប័នរដ្ឋ។ ទី៣៖ រយៈពេលសាងសង់ចន្លោះចាប់ពី៤ខែ ទៅ៦ខែតែប៉ុណ្ណោះ ។ 

ហើយគម្រោងមានក្រុមទីប្រឹក្សាលក់ជាច្រើននាក់ចាំជួយផ្តល់ប្រឹក្សា និងព័ត៌មានលំអិតជូនភ្ញៀវកិត្តិយសដោយភាពទន់ភ្លន់ និងរួសរាយរាក់ជានិច្ចផងដែរ៕ ដោយ:PK