អភិបាលខេត្តកំពង់ចាម​ ណែនាំ និងផ្ដល់ការលេីកទឹកចិត្ត ដល់ប្រជាការពារ ឲ្យចូលរួមសាមគ្គីភាព និងអនុវត្តតួនាទីភារកិច្ច ដេីម្បី ភាពសុខសាន្តរបស់ប្រជាពលរដ្ឋ និងការអភិវឌ្ឍន៍សង្គម

---

កំពង់ចាម៖ ឯកឧត្តម​ អ៊ុន​ ចាន់ដា​ អភិបាល នៃគណៈអភិបាល ខេត្តកំពង់ចាម​ បានណែនាំ និងផ្ដល់ការលេីកទឹកចិត្ត ដល់ប្រជាការពារទាំងអស់ ចូលរួមសាមគ្គីភាព និងអនុវត្តតួនាទីភារកិច្ច ដេីម្បី ភាពសុខសាន្តរបស់ប្រជាពលរដ្ឋ និងការអភិវឌ្ឍន៍សង្គមជាតិ ឲ្យកាន់តែល្អប្រសើរ ថែមទៀត ។ ឯកឧត្តម​ អ៊ុន​ ចាន់ដា​ ថ្លែងណែនាំយ៉ាងដូច្នេះ នាឱកាសអញ្ជេីញក្នុងពិធីសំណេះសំណាល និងផ្តល់សម្ភារៈ​ ឯកសណ្ឋាន​ ជូនប្រជាការពារ ចំនួន ៣០៦នាក់​ នៅក្នុងសង្កាត់ ទាំង៤​ ក្រុងកំពង់ចាម​ ដែលរៀបចំនៅសាលសាលាខេត្ត នាព្រឹកថ្ងៃទី០៧ ខែកុម្ភៈ ឆ្នាំ២០២៣ នេះ ។ ពិធីនេះក៏មានការអញ្ជើញចូលរួម ពីឯកឧត្តម អភិបាលរងខេត្ត ឯកឧត្ដម​ ប្រធានសាលាដំបូងខេត្តកំពង់ចាម​ និង​ឯកឧត្តម​ ព្រះរាជអាជ្ញា​ នៃ​អយ្យការអមសាលាដំបូងខេត្ត ព្រមទាំងបងប្អូនប្រជាការពារនៅក្នុងសង្កាត់ទាំង ៤ និងមន្ត្រីពាក់ព័ន្ធ ជាច្រើនអ្នក ផងដែរ។

ឯកឧត្តម​ អភិបាល ខេត្តកំពង់ចាម​ បានបន្ថែមទៀត​ថា​ ក្នុងនាមជាប្រជាការពារ​ នៅតាមភូមិឃុំសង្កាត់​ ត្រូវធ្វេីខ្លួនយ៉ាងណា ឲ្យក្លាយជាគំរូល្អ ដល់ប្រជាពលរដ្ឋទូទៅ​ និងរួមសហការជាមួយ កម្លាំងនគរបាលប៉ុស្តិ៍រដ្ឋបាលនីមួយៗ អាជ្ញាធរ ក្នុងកិច្ចការពារ ថែរក្សា សន្តិសុខ សុវត្ថិភាព​ និងសណ្តាប់​ធ្នាប់​សាធារណៈ​ ជាពិសេស ការចូលរួម អនុវត្តវិធានការទប់ស្កាត់​អំពេីប្លន់​ លួចឆក់​ និងបទល្មេីសផ្សេងៗ​ ដើម្បី ភូមិ ឃុំមានសុវត្ថិភាព និងភាពសុខសាន្ត ជូនប្រជាពលរដ្ឋ សហគមន៍ ក៏ដូចជាសង្គមជាតិ ផងដែរ ។

យកឱកាសនោះដែរ ឯកឧត្ដម​ អភិបាលខេត្ត​កំពង់ចាម​ ក៏បានលេីកទឹកចិត្ត ដល់ប្រជាការពារទាំងអស់ ដែលខិតខំបំពេញតួនាទីដោយស្ម័គ្រចិត្ត​ លះបង់​ កម្លាំង​កាយ​ កម្លាំង​ចិត្ត​ បន្តការគាំទ្រ​ និងអនុវត្តនូវគោលនយោបាយភូមិ ឃុំ មានសុវត្ថិភាព ររបស់រាជរដ្ឋាភិបាល ជាពិសេស ការចូលរួមទាំងអស់គ្នា ដើម្បី បង្ក្រាបរាល់បទល្មេីសនានា ឲ្យខានតែបាន​ ។ ពីព្រោះថា កម្លាំង​ប្រជាការពារ​ ក៏ជាអ្នកការពារសុខសវត្ថិភា​ព​ និងភាពសុខសាន្តជូនប្រជាពលរដ្ឋ និងចូលរួមចំណែកផ្សព្វផ្សាយ​ បង្ការការពារ​ ទប់ស្កាត់​ ការឆ្លងរីករាលដាលនូវជម្ងឺកូវីដ១៩​ បម្លែងថ្មី​ កុំរាលក្នុងសហគមន៍ ។ ទន្ទឹមនឹងនេះដែរ​ ឯកឧត្ដម​ អ៊ុន​ ចាន់ដា​ បានស្នេីដល់គ្រប់មន្ត្រីនគរបាល និងកម្លាំងប្រជាការពារទាំងអស់​ ត្រូវតែការពារសុខសន្តិភាព ដែលកំពុងមាន នាពេលបច្ចប្បន្ន​ និងរៀបចំសណ្តាប់ធ្នាប់ ក្នុងដំណេីរការបោះឆ្នោតឲ្យរលូត​ ជាពិសេស នាថ្ងៃខាងមុខនេះកម្ពុជា​ គឺជាម្ចាស់ផ្ទះកីឡាស៉ីហ្គេម ផងដែរ ៕