រដ្ឋបាលខេត្តស្វាយរៀង បើកសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣

---

(ខេត្តស្វាយរៀង): ឯកឧត្តម ជុំ ហាត ប្រធានក្រុមប្រឹក្សាខេត្ត និង ឯកឧត្តម ម៉ែន វិបុល អភិបាលខេត្តស្វាយរៀង

នាព្រឹកថ្ងៃព្រហស្បតិ៍២កេីត​ ខែចេត្រ​​ ឆ្នាំខាល​ ចត្វាស័ក​ ព.ស២៥៦៦​ ត្រូវនឹងថ្ងៃទ២៣​ ខែមីនា​ ​ឆ្នាំ២០២៣នេះ​ បានអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ២០២២​ និងលើកទិសដៅការងារឆ្នាំ២០២៣​ របស់រដ្ឋបាលខេត្តស្វាយរៀង។

ឯកឧត្តម ជុំ​ ហាត​ ប្រធានក្រុមប្រឹក្សាខេត្តមានប្រសាសន៍ថា​ ក្នុងនាមក្រុមប្រឹក្សា និងគណៈអភិបាលខេត្ត សូមសម្ដែងនូវការកោតសរសើរ និងវាយតម្លៃខ្ពស់ចំពោះការកិច្ចខិតខំប្រឹងប្រែងទាំងអស់របស់អាជ្ញាធរដែនដី មន្ទីរ-អង្គភាព មន្ត្រីរាជការ និងកងកម្លាំងគ្រប់លំដាប់ថ្នាក់ ដែលបានខិតខំយកចិត្តទុកដាក់បំពេញការងារស្របតាមតួនាទី ភារកិច្ចរបស់ខ្លួន ក្នុងស្មារតីទទួលខុសត្រូវខ្ពស់ ធ្វើឱ្យរដ្ឋបាលខេត្ដ សម្រេចបាននូវសមិទ្ធផលជាច្រើនគួរជាទីមោទន ទាំងការអភិវឌ្ឍន៍ខេត្ដ និងការធានាស្ថិរភាពនយោបាយ សន្ដិសុខសង្គម សុខសុវត្ថិភាពសណ្ដាប់ធ្នាប់សាធារណៈ បានយ៉ាងល្អប្រសើរ និងថ្លែងអំណរគុណដល់មន្រ្ដីសុខាភិបាល និងអាជ្ញាធរពាក់ព័ន្ធគ្រប់លំដាប់ថ្នាក់ ដែលបានខិតខំយ៉ាងសកម្ម ក្នុងការពុះពារប្រយុទ្ធប្រឆាំងនឹងជំងឺកូវីដ-១៩ ពិសេសយុទ្ធនាការចាក់វ៉ាក់សាំងដូសជម្រុញប្រឆាំងជំងឺកូវីដ១៩។

ឯកឧត្តម ម៉ែន​ វិបុល​ អភិបាលខេត្តបានដាក់ចេញនូវទិសដៅសំខាន់ៗមួយចំនួនដូចខាងក្រោម៖

១-បន្តថែរក្សាសន្តិភាព​ បន្តថែរក្សាការពារនូវស្ថេរភាពនយោបាយ​ សន្តិសុខ​ សណ្តាប់ធ្នាប់សាធារណៈ​ និងរបៀបរៀបរយសង្គម​ ការបង្ការទប់ស្កាត់​ និងបង្ក្រាបបទល្មេីសនានាតាមរយះការអនុវត្តគោលនយោបាយភូមិឃុំមានសុវត្ថិភាព។

២-ត្រូវបន្តពង្រឹង​ និងរឹតបន្តឹងការអនុវត្តច្បាប់ចរាចរណ៍ផ្លូវគោកឲ្យបានតឹងរឹង​ នឹងម៉ឺងម៉ាត់បំផុត។

៣-​ ត្រូវបន្តអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ឲ្យបានម៉ឺងម៉ាត់​ នឹងផុលផុស។

៤-​រដ្ឋបាលក្រុង ស្រុក ឃុំ សង្កាត់ និងកម្លាំងមានសមត្ថកិច្ច ត្រូវបន្តប្រតិបត្តិការបង្ក្រាបល្បែងស៊ីសងខុសច្បាប់គ្រប់ប្រភេទ ទាំងល្បែងភ្នាល់តាមប្រព័ន្ធអនឡាញខុសច្បាប់ និងល្បែងស៊ីសងនៅតាមមូលដ្ឋាន ។

៥.រដូវក្ដៅនាពេលខាងមុខ នឹងងាយនាំឲ្យកើតមានឡើងនូវករណី អគ្គិភ័យ ដូច្នេះ ខ្ញុំសូមឲ្យគ្រប់សមាសភាពពាក់ព័ន្ធទាំងអស់ ត្រូវបង្កើនការផ្សព្វផ្សាយដល់ប្រជាពលរដ្ឋ ឲ្យមានការ ប្រុងប្រយ័ត្នគ្រប់ពេល ចំពោះរាល់ដើមហេតុ ទាំងឡាយដែលអាចបង្កឲ្យកើតមានគ្រោះអគ្គិភ័យ។

៦-​ ត្រូវមានវិធានការរដ្ឋបាល​ និងវិធានការច្បាប់អោយបានតឹងរឹងបំផុត​ ក្នុងការទប់ស្កាត់អោយបានទាន់ពេលវេលា​ រាល់សកម្មភាពរំលោភយកដីសាធារណៈ​ ការសាងសង់សំណង់ផ្សេងៗ​ រំលោភលេីដីចំណីផ្លូវ​ និងការចាក់ដីចូល​ ព្រែក​ ទន្លេ​ បឹងបួរដែលជាទ្រព្យសម្បត្តិរបស់រដ្ឋមកធ្វេីជាកម្មសិទ្ធិឯកជន។

ជាចុងបញ្ចប់នៃពិធីបេីកសន្និបាតនៅព្រឹកនេះ​ ឯកឧត្តមអភិបាលខេត្តបានប្រគល់នូវប្រាក់រង្វាន់ជ័យលាភីភូ​មិឃុំមានសុវត្ថិភាព​ ដល់លោកអភិបាលក្រុងស្រុកទាំង៨​ ដេីម្បីចែកជូនទៅដល់ប៉ុស្តិ៍រដ្ឋបាលឃុំ​ សង្កាត់​ ផងដែរ៕

ដោយ:PK