លោកឧត្តមសេនីយ៍ទោ សិទ្ធិ ឡោះ អញ្ជើញជាអធិបតីក្នុងពិធីចែកលិខិតសរសើរដល់កងកម្លាំងនគរបាល៥១៨នាក់ ដែលមានស្នាដៃល្អក្នុងការបំពេញការងារកន្លងមក

---

បន្ទាយមានជ័យ៖ នៅព្រឹកថ្ងៃទី២៩ ខែឧសភា ឆ្នាំ២០២៣ នៅស្នងការដ្ឋាននគរបាលខេត្តបន្ទាយមានជ័យ បានប្រារព្ធពិធីចែកលិខិតសរសើរដល់កម្លាំងនគរបាលទូទាំងខេត្ត សរុប ចំនួន៥១៨នាក់នាក់ ដែលមានស្នាដៃល្អ ក្នុងកិច្ចការពារ រក្សាសន្តិសុខ សណ្តាប់ធ្នាប់សាធារណៈ ជូនជាតិ មាតុភូមិកន្លងមក។

ពិធីនេះត្រូវបានប្រារព្ធធ្វើឡើង ក្រោមអធិបតីភាព លោកឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្តបន្ទាយមានជ័យ។ ក្នុងនោះក៏មានការអញ្ជើញចូលរួមពី លោក លោកស្រី ឧត្តមសេនីយ៍ត្រី វរសេនីយ៍ ស្នងការរង , លោក លោកស្រី វរសេនីយ៍ នាយ នាយរង ការិយាល័យជំនាញ លោកអធិការនគរបាលក្រុង-ស្រុកទាំង៩ លោកមេបញ្ជាការវរនគរបាលការពារព្រំដែនគោកទាំង៤ លោកមេប៉ុស្តិ៍ទាំង៦៧ និងមន្ត្រីនគរបាលជាច្រើនរូប។

ឆ្លៀតក្នុងឱកាសនោះ លោកឧត្តមសេនីយ៍ទោ សិទ្ធិ ឡោះ ក៏បានកោតសរសើរនិងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់កងកម្លាំងគ្រប់ផ្នែកពាក់ពន្ធ័ទាំងអស់ ដែលបានបំពេញបេសកម្ម បំពេញការងារ តួនាទី ភារកិច្ច បានលទ្ធផលយ៉ាងល្អគួជាទីមោទនៈ ទាំងការ ការពារសន្តិសុខសណ្តាប់ធ្នាប់ ការផ្តល់សេវាសាធារណ: ការងារគ្រោះមន្តរាយ ការងារសង្គម ការប្រចាំបញ្ជា យាម ល្បាត ការទប់ស្កាត់ បង្ការ បង្ក្រាបសង្គ្រោះជាដើម។

លោកឧត្តមសេនីយ៍ទោស្នងការ បានជំរុញដល់កងកម្លាំងទាំងអស់ត្រូវគោរពច្បាប់ និងគោរពវិន័យ០០៦ , បន្តសាមគ្គីភាពផ្ទៃក្នុងឲ្យបានល្អ , ត្រូវអនុវត្តន៍តួនាទី ភារកិច្ច និងបទបញ្ជា របស់ថ្នាក់លើឲ្យបានល្អ និងមានប្រសិទ្ធភាព ខ្ពស់ ។

ផ្សារភ្ជាប់ជាមួយកម្មវិធីនេះដែរ លោកឧត្តមសេនីយ៍ទោ សិទ្ធិ ឡោះ ក៏បានឧបត្ថម្ភថវិកាសរុបចំនួន១,០០០ដុល្លា ដល់កម្លាំងនគរបាលជំនាញព្រហ្មទណ្ឌកំរិតធ្ងន់ និងកម្លាំងនគរបាលនៃអធិការដ្ឋាននគរបាលក្រុងប៉ោយប៉ែត ដោយ០១អង្គភាព ចំនួន៥០០ដុល្លា ដែលបានដុតដៃដុតជើងស៊ើបអង្កេតជុំវិញករណីស្លាប់របស់កុមារី លីហ្សា នៅក្រុងប៉ោយប៉ែត កាលពី០២ឆ្នាំមុន ដោយមិនបោះបង់ចោល រហូតឈានដល់ឃាត់ខ្លួនជនសង្ស័យបាន និងរៀបចំសំណុំរឿងបញ្ជូនទៅសាលាដំបូងខេត្ត ៕ ណុប-រក្សា(២៩០១៦)