បាត់របស់របរញឹកញាប់ពេក ប្តឹងសមត្ថកិច្ច ស្រាវជ្រាវ ឃាត់ខ្លួនប្រុសស្រី៤នាក់ មានទាំងគ្រឿងញៀន

---

ភ្នំពេញ ៖ ជនសង្ស័យប្រុស-ស្រីចំនួន៤នាក់ ត្រូវបានកម្លាំងសមត្ថកិច្ច សហការណ៍ជាមួយកម្លាំងអាជ្ញាធរមូលដ្ឋានឃាត់ខ្លួន ដកហូតបានថ្នាំញៀន ឧបករណ៍ឆ្កឹះសោ និងសម្ភារៈពាក់ព័ន្ធមួយចំនួនទៀត ។ ប្រតិបត្តិការខាងលើ បានធ្វើឡើងកាលពីវេលាម៉ោង១រសៀល ថ្ងៃទី២៤ ខែវិច្ឆិកា ឆ្នាំ២០២១ នៅបន្ទប់ជួលជាន់ទី៣ ក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ ។

ជនសង្ស័យឃាត់ខ្លួនទាំង៤នាក់ ទី១ ឈ្មោះ រុំ សុខដែន ភេទប្រុស អាយុ៣០ឆ្នាំ ស្រុកកំណើតនៅខេត្ត កោះកុង ។ ទី២ ឈ្មោះ ខៀវ ប៉ាច់ ភេទស្រី អាយុ៤៨ឆ្នាំ ស្រុកកំណើតនៅខេត្តតាកែវ ត្រូវជាប្រពន្ធរបស់ជនសង្ស័យទី១ ។ ទី៣ ឈ្មោះ ចឹក ស្រីណុច ភេទស្រី អាយុ៣៣ឆ្នាំ មានស្រុកកំណើត ស្រុកស្អាង ខេត្តកណ្ដាល ។ ទី៤ ឈ្មោះ ឃឹម ចាន់វាសនា ភេទប្រុស អាយុ២៩ឆ្នាំ មុខរបរ កម្មកររោងចក្រ មានទីលំនៅភូមិអូរដឹម សង្កាត់ចោមចៅ៣ ខណ្ឌពោធិសែនជ័យ ។

បើតាមសមត្ថកិច្ចបានឲ្យដឹងថា ក្រោយពីទទួលបានសេចក្តីរាយការណ៍ពីម្ចាស់ផ្ទះជួលខាងលើ ជុំវិញសភាពការណ៍ក្នុងមូលដ្ឋាន ញឹកញាប់ពេកហើយ បងប្អូនដែលស្នាក់នៅតាមបន្ទប់ជួល បាត់បង់សម្ភារៈ របស់របរប្រើប្រាស់ផ្សេងៗ និងសង្ស័យមានអ្នកលួចជក់គ្រឿងញៀន ទើបនៅរសៀលថ្ងៃទី២៤ ខែវិច្ឆិកា ឆ្នាំ២០២១ ដោយមានការដឹកនាំដោយលោក នាង ឧត្តម នាយប៉ុស្តិ៍រដ្ឋបាល ក្រោមបញ្ជាពីលោក វរសេនីយ៍ឯក ម៉ន វុធី អធិការខណ្ឌពោធិសែនជ័យ សហការណ៍ជាមួយកម្លាំងអាជ្ញាធរសង្កាត់ រួមជាមួយម្ចាស់ផ្ទះ ធ្វើការត្រួតពិនិត្យ តាមបន្ទប់ជួល ឈានដល់ឃាត់ខ្លួនជនសង្ស័យបាន៤នាក់ ប្រុស២នាក់ ស្រី២នាក់ លុះត្រួតពិនិត្យមើលក្នុងបន្ទប់ជនសង្ស័យ រកឃើញសម្ភារៈ ដែលអ្នកជិតខាងបាត់បង់កន្លងមក ថ្នាំញៀន១កញ្ចប់ ឧបករណ៍ឆ្កឹះសោ ចំណែកបន្ទប់មួយទៀត រកឃើញសំណល់គ្រឿងញៀន ថង់សម្រាប់ច្រកគ្រឿងញៀន និងសម្ភារៈឧបករណ៍ជក់ពាក់ព័ន្ធមួយចំនួនទៀត ។

ក្រោយពីឃាត់ខ្លួនបានជនសង្ស័យ ទាំង៤នាក់ពាក់ព័ន្ធបទល្មើសលួច និងប្រើប្រាស់គ្រឿងញៀន សមត្ថកិច្ចនាំទៅសាកសួរនៅប៉ុស្តិ៍ត្រពាំងក្រសាំង ដើម្បីកសាងសំណុំរឿងបញ្ជូនទៅផ្នែកជំនាញ ចាត់ការបន្តតាមនីតិវិធី ៕

អត្ថបទដោយៈចាន់តូ