ប្រទេសថៃ រកឃើញករណីកូវីដ-១៩ បំប្លែងថ្មី Omicron ដំបូង

---

ថៃ៖ មន្ត្រីជាន់ខ្ពស់ក្រសួងសុខាភិបាលសាធារណៈរបស់ថៃ បាននិយាយកាលពីថ្ងៃចន្ទថា វីរុសបំប្លែងថ្មី ត្រូវបានរកឃើញលើបុរសជំនួញជនជាតិអាមេរិក ដើមកំណើតថៃម្នាក់ ដែលបានធ្វើដំណើរពីប្រទេសអេស្ប៉ាញ មកដល់ប្រទេសថៃ។

អគ្គនាយក នៃនាយកដ្ឋានវិទ្យាសាស្ត្រវេជ្ជសាស្ត្រ លោក Supakit Sirilak បាននិយាយថា វីរុសបំប្លែងថ្មីនេះ ត្រូវបានរកឃើញនៅក្នុងការធ្វើតេស្ត RT-PCR ដែលធ្វើឡើងនៅពេលដែលបុរសអាយុ ៣៥ ឆ្នាំរូបនេះបានមកដល់ប្រទេសថៃ។

ប្រធាននាយកដ្ឋានគ្រប់គ្រងជំងឺ លោក Opas Karnkawinpong បានបន្ថែមថា អ្នកជំនួញរូបនេះ គឺជាពលរដ្ឋអាមេរិក ដែលបានរស់នៅក្នុងប្រទេសអេស្បាញរយៈពេលមួយឆ្នាំ មុនពេលគាត់មកដល់ប្រទេសថៃ។  គាត់បានធ្វើដំណើរតាមរយៈយន្តហោះ Emirates Airline ជើងហោះហើរលេខ EK372 ពីទីក្រុងឌូបៃ ទៅកាន់អាកាសយានដ្ឋានសុវណ្ណភូមិប្រទេសថៃ ហើយមិនមានរោគសញ្ញាអ្វីឡើយ។ 

វាមិនច្បាស់ថាថ្ងៃណាដែលគាត់បានចូលប្រទេសថៃទេ ខណៈដែលលោកវេជ្ជបណ្ឌិត Opas បាននិយាយថាគាត់បានមកដល់នៅថ្ងៃទី២៩ ខែវិច្ឆិកា ប៉ុន្តែតារាងដែលបង្ហាញដោយក្រសួងក្នុងអំឡុងពេលសន្និសីទសារព័ត៌មានរបស់អ្នកជំងឺ បានបង្ហាញនៅថ្ងៃទី៣០ ខែវិច្ឆិកា។  វេជ្ជបណ្ឌិត Opas បានបន្ថែមថា បុរសនោះបានធ្វើតេស្ត RT-PCR នៅប្រទេសអេស្ប៉ាញកាលពីថ្ងៃទី២៨ ខែ វិច្ឆិកា មុនពេលគាត់ចាកចេញទៅប្រទេសថៃតាមរយៈក្រុមហ៊ុន United Arab Emirates។ អ្នកជំងឺរូបនេះបានទទួលការចាក់វ៉ាក់សាំងប្រភេទ Johnson & Johnson មួយដូស ដែលជាធម្មតាវ៉ាក់សាំងប្រភេទនេះ ត្រូវការចាក់តែមួយដងប៉ុណ្ណោះ។ 

លោកវេជ្ជបណ្ឌិត Opas បាននិយាយថា អ្នកជំនួញរូបនេះ កំពុងត្រូវបានព្យាបាលនៅមន្ទីរពេទ្យ បន្ទាប់ពីការធ្វើតេស្ត RT-PCR វិជ្ជមាន។ ចំពោះការធ្វើតេស្តលម្អិតបន្ថែមទៀត ត្រូវបានធ្វើឡើងនៅនាយកដ្ឋានវិទ្យាសាស្ត្រវេជ្ជសាស្ត្រកាលពីថ្ងៃសុក្រ។

លោកវេជ្ជបណ្ឌិត Supakit បាននិយាយថា "ឱកាសដែលឆ្លងវីរុសបំប្លែងថ្មី Omicron នេះ គឺ ៩៩.៩២%" ។  លោកវេជ្ជបណ្ឌិត បានជំរុញរដ្ឋាភិបាលកុំឱ្យជំនួសការធ្វើតេស្ត RT-PCR ជាមួយនឹងការធ្វើតេស្តរកប្រព័ន្ធការពារអង់ទីហ្សែន ហើយរំពឹងថាមានករណីជាច្រើនទៀតនឹងត្រូវបានរកឃើញ។ លោកបានថ្លែងថា៖ «ប្រសិនបើមានករណីទីមួយ យើងជឿថានឹងមានករណីទី ២ និងទី ៣»។ 

ក្រសួងបាននិយាយថា អ្នកជំងឺបានទាក់ទងជាមួយបុគ្គលិកអាកាសយានដ្ឋានពីរនាក់ និងបុគ្គលិកសណ្ឋាគារ ១៧នាក់។

អ្នកនាំពាក្យរដ្ឋាភិបាលលោក Thanakorn Wangboonkongchana បាននិយាយថា លោកនាយករដ្ឋមន្ត្រី Prayut Chan-o-cha បានអំពាវនាវឱ្យមានភាពស្ងប់ស្ងាត់ពីសាធារណជន ខណៈដែលលោកនាយករដ្ឋមន្រ្តីនៅតែមានទំនុកចិត្តលើដំណើរការពិនិត្យអ្នកទេសចរដែលចូលមកក្នុងប្រទេសថៃ និងសមត្ថភាពនៃប្រព័ន្ធសុខាភិបាលរបស់ព្រះរាជាណាចក្រថៃ ក្នុងការប្រយុទ្ធប្រឆាំងនឹងជំងឺរាតត្បាតនេះ។  អ្នកនាំពាក្យរូបនេះបានបន្ថែមថា លោកនាយករដ្ឋមន្ត្រី និងអ្នកជំនាញសុខាភិបាលកំពុងធ្វើការយ៉ាងជិតស្និទ្ធ ដើម្បីតាមដានស្ថានការណ៍។ 

ប្រទេសថៃ គឺជាប្រទេសទី៤៧ ដែលរកឃើញវីរុសបំប្លែងថ្មី Omicron ។

ប្រភព៖ The Bangkok Post